اسلام آباد (تادیب) عالمی یومِ انصاف کے موقع پر 17 جولائی 2026 کو چرچ آف پاکستان کے موڈریٹر/پریذیڈنٹ بشپ اور بشپ آف رائیونڈ آرچ بشپ ڈاکٹر آزاد مارشل کی قیادت میں آئی ایم آر ایف کے بین المذاہب مذہبی رہنماؤں کے ایک اعلیٰ سطحی وفد نے وفاقی آئینی عدالتِ پاکستان کا دورہ کیا، جہاں وفد کی ملاقات معزز چیف جسٹس جسٹس امین الدین خان اور عدالت کے معزز جج صاحبان سے ہوئی۔
ملاقات کے دوران آرچ بشپ ڈاکٹر آزاد مارشل نے چیف جسٹس اور معزز جج صاحبان کی جانب سے پرتپاک استقبال پر دلی شکریہ ادا کیا اور آئینِ پاکستان میں انصاف، مساوات، مذہبی آزادی اور تمام شہریوں کے بنیادی حقوق کے تحفظ سے متعلق آئینی اصولوں کی توثیق کو سراہا۔ انہوں نے کہا کہ یہ اصول ایک منصفانہ، پرامن اور ہم آہنگ معاشرے کی بنیاد ہیں۔
انہوں نے اس بات پر زور دیا کہ اس ملاقات نے مختلف مذاہب سے تعلق رکھنے والے رہنماؤں اور ریاستی اداروں کے درمیان باہمی اعتماد، مکالمے اور تعاون کو مزید مستحکم کرنے میں اہم کردار ادا کیا ہے۔ انہوں نے اس عزم کا اعادہ کیا کہ پاکستان میں بین المذاہب ہم آہنگی، ہر برادری کے وقار کے احترام اور آئین کے تحت تمام شہریوں کو مساوی حقوق، مساوی مواقع اور یکساں قانونی تحفظ کی فراہمی کے لیے مشترکہ کوششیں جاری رکھی جائیں گی۔
وفد میں شامل مذہبی رہنماؤں نے بھی اس عزم کا اظہار کیا کہ وہ ایسے تمام قومی اداروں کے ساتھ تعاون جاری رکھیں گے جو انصاف، امن، مذہبی آزادی، انسانی وقار اور آئینی بالادستی کے فروغ کے لیے سرگرمِ عمل ہیں۔
ملاقات کے اختتام پر پاکستان میں انصاف، امن، حکمت، قومی یکجہتی اور بین المذاہب ہم آہنگی کے فروغ کے لیے خصوصی دعا کی گئی۔ اس موقع پر امید ظاہر کی گئی کہ ریاستی اداروں اور مذہبی قیادت کے باہمی تعاون سے ملک میں آئین کی بالادستی، قانون کی حکمرانی اور تمام شہریوں کے بنیادی حقوق کے تحفظ کو مزید مضبوط بنایا جا سکے گا۔
