وہاڑی (نیا تادیب) — شاعری جب محض جذبات کے اظہار سے آگے بڑھ کر علمی و ادبی تحقیق کا موضوع بن جائے تو یہ شاعر کے تخلیقی سفر کے لیے ایک اہم سنگِ میل کی حیثیت رکھتی ہے۔ معروف شاعر فادر عمانوئیل نذیر مانی کے شعری مجموعے’’روشنی بانٹ دو زمانے میں‘‘ کو یہ اعزاز حاصل ہوا ہے کہ گورنمنٹ گریجویٹ کالج برائے خواتین، وہاڑی کی طالبہ جویریہ رمضان نے اس پر بی ایس اردو کی ڈگری کے لیے اپنا تحقیقی مقالہ مکمل کر لیا ہے۔
کسی شاعر کے کلام کو اعلیٰ تعلیمی سطح پر تحقیق کے لیے منتخب کیا جانا اس کی ادبی معنویت، فکری جہات اور شعری اسلوب کے مطالعے کی اہمیت کو اجاگر کرتا ہے۔ جویریہ رمضان کی یہ کاوش فادر عمانوئیل نذیر مانی کی شاعری کے تحقیقی و تنقیدی مطالعے کی جانب ایک قابلِ ذکر پیش رفت ہے۔
شعری مجموعے کا عنوان’’روشنی بانٹ دو زمانے میں‘‘ اپنے اندر اُمید، خیر خواہی اور انسان دوستی کا پیغام سموئے ہوئے ہے۔ اس مجموعے پر تحقیقی مقالے کی تکمیل اس امر کی نشان دہی کرتی ہے کہ شاعر کے کلام کو اب علمی حلقوں میں مطالعے اور تحقیق کے تناظر میں بھی دیکھا جا رہا ہے۔یہ پیش رفت نہ صرف فادر عمانوئیل نذیر مانی کے ادبی سفر میں ایک اہم اضافہ ہے بلکہ اردو شاعری کے مطالعے اور ادبی تخلیقات کو جامعاتی تحقیق کا حصہ بنانے کے حوالے سے بھی حوصلہ افزا ہے۔
*******
