اسلام آباد (تادیب نیوز) وفاقی حکومت نے پٹرولیم مصنوعات کی قیمتوں میں ایک مرتبہ پھر اضافہ کردیا ہے، جس کے بعد ملک میں ایندھن مزید مہنگا ہوگیا۔ پٹرول اور ڈیزل کی نئی قیمتیں 11 ستمبر 2026 سے نافذ العمل ہوں گی۔پٹرولیم ڈویژن کی جانب سے جاری کردہ نوٹیفکیشن کے مطابق پٹرول کی قیمت میں 3 روپے 5 پیسے فی لٹر اضافہ کیا گیا ہے، جس کے بعد اس کی نئی قیمت 370 روپے 80 پیسے فی لٹر مقرر ہوگئی ہے۔اسی طرح ڈیزل کی قیمت میں 5 روپے 37 پیسے فی لٹر کا اضافہ کیا گیا ہے، جس کے بعد ہائی اسپیڈ ڈیزل 398 روپے 4 پیسے فی لٹر میں دستیاب ہوگا۔
حکومت کی جانب سے جاری نوٹیفکیشن کے مطابق نئی قیمتوں کا اطلاق 11 ستمبر 2026 سے ہوگا اور موجودہ اعلان کے تحت یہ نرخ صرف ایک روز کے لیے نافذ رہیں گے۔پٹرولیم مصنوعات کی قیمتوں میں مسلسل اضافے نے شہریوں کے لیے سفری اخراجات اور روزمرہ ضروریات کی لاگت میں مزید اضافے کا خدشہ پیدا کردیا ہے۔ پٹرول اور ڈیزل کی قیمتیں براہِ راست ٹرانسپورٹ کے کرایوں، اشیائے ضروریہ کی ترسیل اور مجموعی کاروباری لاگت پر اثرانداز ہوتی ہیں۔یہ امر بھی قابلِ ذکر ہے کہ حکومت نے گزشتہ روز بھی پٹرولیم مصنوعات کے نرخوں میں اضافہ کیا تھا۔ اس وقت پٹرول 3 روپے 40 پیسے جبکہ ڈیزل 6 روپے 72 پیسے فی لٹر مہنگا کیا گیا تھا۔مسلسل دو روز میں پٹرولیم مصنوعات کی قیمتوں میں ہونے والے اضافے کے باعث صارفین پر ایندھن کے اخراجات کا اضافی بوجھ پڑنے کا امکان ہے۔
*******
