سایہ دیں ہم یا ثمر کاٹ دیئے جاتے ہیں
ہم بھی کیسے ہیں شجر! کاٹ دیئے جاتے ہیں
جب فصاحت، نہ بصیرت، نہ بصارت ہے یہاں
اِس لئے اہلِ نظر کاٹ دیئے جاتے ہیں
ہم برابر کے ہیں شہری تو بتا دے کیوں کر
جان کر غیر بشر کاٹ دیئے جاتے ہیں
کوئی ناکردہ گنہ سر پہ مسلط کر کے
ایک الزام پہ سر کاٹ دیئے جاتے ہیں
یہ ترے امن کے پیغام کی رسوائی ہے
جس طرح لختِ جگر کاٹ دیئے جاتے ہیں
تیری گنتی میں تو وہ بھی ہے جو تیرا ہی نہیں
میرے تو دشت و نگر کاٹ دیئے جاتے ہیں
ہم نہ تقریر میں، ٹی وی پہ، نہ اخبار میں ہیں
جب ہماری ہو خبر کاٹ دیئے جاتے ہیں
پہلے تھے دن مگر اب رات بھی سرخی مائل
کیوں کہ ہم شام و سحر کاٹ دیئے جاتے ہیں
ہم نے پھیلائے نہیں، اور نہ تولے عادلؔ
پَر ہیں ! بس اِس لئے پَر کاٹ دیئے جاتے ہیں
*******
سایہ دیں ہم یا ثمر کاٹ دیئے جاتے ہیں : ڈاکٹر عادلؔ امین
