بین الاقوامی سطح دے مشہور پنجابی شاعر بابا نجمی نوں اک ہور وڈی عزت ملی اے۔اوہناں دا کلام بھارت دی اک یونیورسٹی دے نصاب وچ شامل کر لیا گیا اے۔ ہن بھارتی طلباء اوہناں دی شاعری پڑھے بغیر گریجوایشن مکمل نہیں کر سکن گے۔اوہناں دا کلام بھارتی شہر بیکانیر دی یونیورسٹی آف بیکانیر دے پنجابی نصاب وچ شامل کیتا گیا اے۔ جدید پنجابی شاعری دی اس درسی کتاب دا ناں ”کوی اُڈاری” (شاعرانہ پرواز) اے، جیہڑی ڈاکٹر کلدیپ سنگھ تے سندیپ سنگھ منڈے نے ترتیب دتی اے۔اس کتاب وچ کل بارہ منفرد تے معروف شاعراں دا کلام شامل کیتا گیا اے۔بھارت دے نامور انعام یافتہ شاعر جنہاں وچ شامل نیں:امرتا پریتم، شو کمار بٹالوی، ڈاکٹر جگتار، ڈاکٹر ہربھجن سنگھ، بابا نجمی، اوتار لوپ، بھائی ویر سنگھ، پورن سنگھ، دھنی رام چاترک، پروفیسر موہن سنگھ، سرجیت پاتر، سنت رام اُداسی تے جسونت ظفر۔یاد رہوے، بابا نجمی واحد پاکستانی پنجابی شاعر نیں جنہاں دا کلام بھارت دی کسے وی یونیورسٹی دے نصاب وچ شامل کیتا گیا اے۔
اس توں پہلاں دوہزارتیرہ وچ بھارتی شہر موگا وچ اوہناں دا مجسمہ نصب کیتا گیا سی تے اگلے سال برنالہ وچ وی اوہناں دا مجسمہ سجایا گیا۔ برنالہ وچ کل بارہ ادبی شخصیات دے مجسمے نیں جتھے بابا بلھے شاہ دا مجسمہ وی شامل اے۔اس توں علاوہ اوہناں دا پوسٹر انگلینڈ دے شہر ڈربی دے سکھ نیشنل میوزیم وچ وی لگایا گیا اے۔ کئی سکولاں دے کتب خانے اوہناں دے ناں تے منسوب نیں۔اوہناں اُتے ہُن تک دو ایم فل وی ہو چکے نیں۔اوہ کینیڈا، انگلینڈ، قطر، بھارت تے ہور کئی ملکاں دے دورے کر چکے نیں تے ڈھیراں انعامات حاصل کر چکے نیں۔تاہم اجے تیک حکومت پاکستان نیں اوہناں نوں پرائیڈ آف پرفارمنس ورگے کسے قومی اعزاز نال نہیں نوازیا۔
*******
